O çörəkdə torpağın bərəkəti var, günəşin hərarəti var, külək var, dənin dəyirmanda üyüdülməsi, unun su ilə yoğrulması, bişirilməsi və son halına gətirilməsi var.
Bəziləri çörəyi bəşəriyyətin ən böyük kəşfi hesab edirlər. Amma təəssüflər olsun ki, bu böyük kəşf də bəzən zibil yeşiklərinə atılır.
Dünya üzü  hər cür nemətlərlə təmin olunub. Hamısı da biz insanlar üçün. Bu gün dünyanın bir tərəfində insanlar hər cür naz-nemət içində üzdükləri halda, digər tərəfində aclıq hökm sürür. Bəşəriyyət nemətləri bölə bilmir, daha doğrusu, bu mövzuda İlahi prinsipləri unudub.

Türkiyənin Dənizli vilayətinin Sarayköy rayonunun Tırkaz kəndinin sakini Mehmet Sarıoğlunun taleyinə elə bil güzgü tutur bu sözlər.
Bir vaxtlar adı bütün Türkiyədə məşhurlaşdı. Hətta ona qibtə edənlər də oldu. Zarafat deyil, illik lotereya oyununun qalibi olmuşdu.